Монгол улсын Ерөнхий сайдын 2010 оны 5 дугаар сарын 19-ний өдрийн 42 тоот захирамжаар Эрчим хүчний зохицуулах газрын Зохицуулагчдын зөвлөлийн даргаар Нямжанцангийн Мягмарсүрэнг, тус зөвлөлийн зохицуулагчаар Дашийн Бассайханг 2010 оны 5 дугаар сарын 19-ний өдрөөс 6 жилийн хугацаагаар тус тус томиллоо.
       Н.Мягмарсүрэн нь Украйн улсын Киевийн Политехникийн дээд сургуулийг дулааны хянах хэмжүүр, автоматикийн инженерээр, Монгол улсын Засгийн газрын хэрэгжүүлэгч агентлаг Удирдлагын академийг бизнесийн удирдлагын менежерээр тус тус дүүргэсэн, техникийн ухааны магистр, Монгол улсын зөвлөх инженер. Тэрээр Улаанбаатар хотын "Дулааны 3 дугаар цахилгаан станц" ТӨХК-д автоматикийн инженер, цехийн дарга, хэлтсийн дарга, гүйцэтгэх захирлаар ажиллаж байсан, Монгол улсын эрчим хүчний салбарт 30 гаруй жил тасралтгүй ажилласан туршлагатай боловсон хүчин юм.
       Д.Бассайхан нь Монгол улсын Техникийн их сургуулийг цахилгааны инженер мэргэжлээр, Төрийн захиргаа удирдлагын хөгжлийн институтыг төрийн удирдлагын арга зүй, зохион байгуулалтын менежерээр тус тус дүүргэсэн, ШУТИС-ийн ЭХИС-ийн докторант, Монгол улсын зөвлөх инженер. Д.Бассайхан нь "Дарханы дулааны цахилгаан станц" ТӨХК-д инженер, цехийн дарга, Дарханы Засаг даргын тамгын газарт эрчим хүч, геологи, уул уурхайн улсын байцаагч, "Улаанбаатарын цахилгаан түгээх сүлжээ" ТӨХК-нд гүйцэтгэх захирал, "Төвийн бүсийн цахилгаан дамжуулах сүлжээ" ТӨХК-д гүйцэтгэх захирлаар тус тус ажиллаж байсан эрчим хүчний салбарын туршлагатай боловсон хүчний нэг юм.